Showing posts with label පුද්ගලික. Show all posts
Showing posts with label පුද්ගලික. Show all posts

Wednesday, May 11, 2011

නැගණියේ....ඔබට සුභ මංගලම්....



ලස්සන දවසක පින්බර උදයක

පියාසලා දෙව් අගනක් අහසින්

සප්ත වර්ණ දේදුන්නක නැගිලා

අනන්තයට යනදා...නිම්නැති ආදරේ සොයලා...

-----------------------------------------------------------------------------

අසෙනිය මල් වැසි ඇද වැටිලා - සුදු පාවඩ සැදුවා

විසුරුණ සුභ පැතුමන් ගලපා - මංගල ගී ගැයුවා

සුපිපුණු නෙක මල් පෙති ගානේ - ආදර වදන් ලියා

රන් සමනලියක්.. මලක් වගේ - අද දීගෙක යනවා.....

-----------------------------------------------------------------------------

සුර අගනක්.. සුර කුමරෙකු අතගෙන ..පෝරු මස්තකයේ හිදින වෙලේ

බලන්න ආසයි ගිලිහෙන හසරැලි ..ආදරයෙන් රතු උන මුහුනේ

මාපිය සෙනෙහස උණු කදුලක් වී.. ගලා ගියත් සමු දෙන මොහොතේ

ඔබයි දූ කුමරි එදා වගේ අදත්.. හැමදාමත් ඒ හද මඩලේ.....

-----------------------------------------------------------------------------

ලගින් හිටිය හැම දුරක තියා - මංගල ගමනක ඈ යනවා

රැකවරණය ආදරය පිරී ගිය - අලුත් හිතක හිමිකම ලැබිලා

තෙරුවන් සරණින් දෙවි රැක වරණින් - පැතූ හැම පැතුම් ඉටූ වීලා

ඔය සුදු පාටැති පුංචි පැටව් ලැබ - යුග දිවි සතුටෙන් ඉතිරේවා.....

-----------------------------------------------------------------------------

හමු වී වෙන් වී මතකෙන් ගිලිහෙන - දහසක් හිත මිතුරන් මැද්දේ

දෑතේ දසගිලි වලටත් අඩුවෙන් - ඔබ මා හමු වීලා ඇත්තේ

මනාලියක වූ ඔය රුව දැකුමට - එනමුදු මා පිං කර ඇත්තේ

මහමෙරටත් වැඩි මගෙ සුභ පැතුමන් - මේ කවි තුල සැග වී ඇත්තේ...